සංස්කෘතියක් නිරන්තරයෙන් වෙනස්ව පවතින්නේ පුද්ගල ජිවන අවශ්‍යතා පදනම් කරගනිමිනි. වර්තමානය වනවිට මාධ්‍ය සංදේශ අනුව ස්වකිය අවශ්‍යතා ගොඩනංවා ගැනීමේ ප්‍රවණතාවයට පුද්ගලයා යොමුවී අවසානය . වර්තමානය වන විට ජනමාධ්‍ය බොහෝ ජනජීවිතයේ කාර්යයන් වල අනුප්‍රාප්තිකයා ලෙස කටියුතු කිරීම දැකගත හැක. අදවන විට දරුවන් තම ආච්චි සීයාගෙන් කතන්දර ආසිමේ කලාව ඉවතට ගොසින්ය. අද එම කර්තව්‍ය භාරගෙන ඇත්තේ මාධ්‍යය. ප්‍රෝඪ ඉතිහාසයකට උරුමකම් කියූ ශ්‍රේෂ්ඨ රජවරුන්ගේ , විරුවන්ගේ ලෙයින් උපන් අපේ පරම්පරාවේ කතාන්දරය වසන් කරමින් බෙන්ටෙන් ලා ,ස්පයිඩර් මෑන් ලා , පරමාදර්ශී ප්‍රතිරුප ලෙස දරුවන්ගේ මනසට කාවද්දීමේ අවර ගණයේ උත්සාහයක වත්මන් මාධ්‍ය නියලෙමින් සිටි .
වත්මන් මාධ්‍ය පුද්ගල චර්යාව වෙනස් කරනුයේ අපටත් නොදනිම ය .නිවසක රාත්‍රී කෑම මේසය පවුලේ සියලු දෙනාගේ එකමුතුකම සනිටුහන් කරන ලද නමුත් වර්තමානයේදී නම් පවුලේ සියල්ල එක්තැන් වන තැන රුප පෙට්ටිය බවට පත්කරගෙන අවසනය . මෙලෙසට පුද්ගල සිරිත් විරිත් චර්යාවන් වෙනස් කරමින් මාධ්‍යයේ අවශ්‍යතා ඉටුකර ගැනීමේ ප්‍රභල හැකියාවත් ඔවුන් සතුය .
අතීතයේ සිට චාම් සරල දිවි පැවැත්මක් අගය කල පුද්ගලයා අදවන විට අසීමාන්තික අවශ්‍යතාවන් ගොන්නක් පසුපස ලුහුබදි . අද වත්මන් වෙළදපොල තුල කාන්තාව ප්‍රධාන ඉලක්කගත ග්‍රහකයෙකි . විශේෂයෙන් නිය , හිසකෙස් , සම ආදී වශයෙන් ගත්කල හිසේ සිට දෙපතුල දක්වා සියලු අංග සදහා විවිධ නිෂ්පාදනයන් කාන්තාව ඉලක්ක කරගෙන හදුන්වාදී තිබෙන්නේ ඇය බහුභාණ්ඩික චරිතයක් බවට පත් කරමිනි . මෙලෙසට මාධ්‍ය මගින් පුද්ගලයාගේ මුලික අවශ්‍යතාවන් වෙනුවට ව්‍යාජ අවශ්‍යතාවයන් මතුකරමින් ව්‍යපාරිකයන් හට අවශ්‍ය වෙළදපොල නිර්මාණය කරදීමේ ක්‍රියාදාමයක නිරතවනු දක්නට ලැබේ . මේ අනුව බලන කල මාධ්‍යක මුලික අරමුණ වූ මහජන සේවාව අදවන විට මහජනයා මුලාකිරිම දක්වා වෙනස් වීමකට ලක්ව ඇත්තේ තම පැවැත්ම වෙනුවෙන් ලාභය උපරිම කර ගැනීමේ අරමුණ මත පදනම් ව වන බව පැහැදිලිය .
මේ සියලු කරුණු හමුවේ අප තරයේ අවධානයට ලක් කරගත යුතු කරුණක් පවතී . රට තුල බලවත්, ලෝකය තුල බලවත් නිෂ්පාදන සමාගම් තම ලාභය උපරිම කරගත හැකි කුමන හෝ මාවතක් වෙනුවන් මේ වන විටත් ඔබ මම ඇතුලු අප සැමගේම චර්යාවන් අධ්‍යනයක නිරත වෙම්න් සිටි . එහි අරමුණ ඔබේ ච්න්තන රටාව වෙනස් කරමින් වෙළදපොල තුල ඔබ බහුභාණ්ඩික , සංකර චරිතයක් බවට පත් කිරීමයි. මෙවැනි පසුබිමක් තුල සමාජය අවදි කරන , සමාජය තුල යහපත් හරපද්ධතීන් නිර්මාණය කිරීමට උරදිය යුතු මාධ්‍ය භාවිතයක් පවත්වාගෙන යාම පිලිබදව මාධ්‍ය හිමිකාරිත්වය වගකිවයුතු අතර මාධ්‍ය සංදේශ විචාරශීලිව පරිශීලනය කරමින් මාධ්‍ය සාක්ෂරතාවයෙන් යුතු ග්‍රහකත්වයක් ගොඩනගා ගැනීම පරිශීලකයාගේද යුතුකමකි .
අකිලා නිර්මානි ද සිල්වා
