සන්නිවේදනයේ දියුණුවත් සමඟම මිනිසාගේ සමාජ සම්බන්ධතාද විශ්වයේ අස්සක්
මුල්ලක් නෑර පැතිර ගොස් ඇත. එම සම්බන්ධතා ගොඩනැංවීමේ ක්‍රමවේදයක් ලෙස ෆේස්බුක්
හෙවත් මුහුණු පොතට හිමිවන්නේ සුවිශේෂි ස්ථානයකි. අන්තර්ජාලය තුළ සමාජ සම්බන්ධතා, තාක්ෂණය වැඩිදියුණු කරමින් නිර්මාණය කරන ලද මෙය
අන්තර්ජාල ඉතිහාසය තුළ බිහි වූ ලෝකයාට බෙහෙවින් බලපැම් කළ හැකි සමාජ ජාලයක් වශයෙන්
හැඳින්වීමට පුළුවන.
ලෝකයේ සිටින පුද්ගලයන් එකිනෙක සම්බන්ධ කරන්නා වූ හුයක් බවට වර්තමානයේ
මුහුණුපොත ඉදිරියෙන්ම සිටියද මෙහි නිශේධනීය පැතිකඩක් ද පවතින බව විශේෂයෙන් සඳහන්
කළ යුතුය. ඕනෑම දෙයක් යහපත් ලෙස භාවිත කිරීමට හැකියාව තිබියදී එය අයහපතටම යොදා
ගන්නා පිරිස අප අතර ද නැතුවාම නොවේ. ෆේස් බුක් ද එවැන්නකි. එකිනෙකාට බැණ වදිමින්
නින්දා -අපහාස කරමින් වෛරය වැපිරවීමේ මෙවලමක් ලෙස ෆේස්බුක් භාවිත කරන්නන්ගෙන්
අඩුවක් නැත. මෑතක දී සිට ඉතා සුලභව මුහුණුපොත හරහා විවේචනයට ලක්වන පිරිසක් ලෙස
සංක්‍රාන්ති ලිංගික පුද්ගලයන් හැඳින්වීමට පුළුවන. විවිධ ආකාරයෙන් සිදු කරනු ලබන
විවේචන හේතුවෙන් සමාජයේ ජනමතය ද සංක්‍රාන්ති ලිංගික පුද්ගලයන් කෙරෙහි විවේචනශීලී
මුහුණුවරක් ගැනීම අරුමයක් නොවේ. විශේෂයෙන් මෙම සංක්‍රාන්ති ලිංගික පුද්ගලයන් යනු
කවුරුන්දැයි යන්න පිළිබඳව නිසි අවබෝධයකින් තොරවීම මෙම තත්ත්වයට බලපා ඇති ප්‍රධාන
කරුණ වී ඇති බව පැහැදිලිය.
සංක්‍රාන්ති ලිංගිකයන් යනු කවුරුන්ද?
ස්ත්‍රී පුරුෂ ලිංගභේදය යනුවෙන් සරලව අප හඳුන්වන්නේ උපතින්ම හිමි වන
ලිංගිකභාවයේ වෙනසයි. ජීව විද්‍යාත්මකව ස්වභාවිකව සියලුම ජීවීහු ස්ත්‍රී පුරුෂ යන
බෙදීමට ලක්ව උපත ලබයි. ස්ත්‍රිය හා පුරුෂයා අතර ඇති මෙම ජීව විද්‍යාත්මක ලිංගික
වෙනස හේතුවෙන් ඔවුනොවුන්ගේ අඟ පසඟ ඉන්ද්‍රියන් හා ශරීර වර්ධනය වෙනස් අයුරින් සිදු
වේ. ජීව විද්‍යාත්මකව ස්ත්‍රියට හා පුරුෂයාට ලැබී ඇති ලිංගික වෙනස මත සමාජය විසින්
දීර්ඝ කාලයක පටන් වෙනස් වූ සමාජ තත්ත්වයන් මෙම දෙපක්ෂය සඳහාම නිර්මාණය කර ඇත.
විශේෂයෙන් මේ අයුරින් තමන්ට උපතේදීම සංස්කෘතික වශයෙන් ලබා දෙන ස්ත්‍රී පුරුෂ
සමාජභාවය පිළිගැනීමට අකමැති එකිනෙකා අතර විවිධ වෙනස්කම් ඇති පුද්ගලයන් සිටින අතර
ඔවුන් හැඳින්වීමට යොදනු ලබන පොදු වචනයක් ලෙස සංක්‍රාන්ති ලිංගිකයන් හැඳින්වීමට
පුළුවන. සංක්‍රාන්ති ලිංගික පුද්ගලයකු යනු විරුද්ධ ලිංගය සමඟ මානසිකව අනන්‍ය වූත්
ඇතැම්විට අවශ්‍ය කායික පෙනුම ලබා ගැනීමට බාහිර සැත්කම් හෝමෝන ප්‍රතිකාර කර ගැනීම
මඟින් විරුද්ධ ලිංගයේ සාමාජිකයෙකු ලෙස ජීවත්වීමට උත්සාහ කරන්නාවූ පුද්ගලයෙකි.
මෙවැන්නෝ පුරුෂයන් ලෙස ඉපදී සිටියත් ස්ත්‍රියක් ලෙස ජීවත්වීමට
කැමැත්තක් දක්වති. ස්ත්‍රීන්ද එසේමය. හෝමෝන් ප්‍රතිකාර හා ශල්‍යකර්ම මඟින්
පරිවර්තනයට ලක්වූවෝ බොහෝය. උදාහරණයක් ලෙස වෙනිසියුලාවේ දේශපාලන ක්‍රියාකාරිනියක වන
තමරා ඒඩ්‍රියන්, ඉන්දියාවේ පොලිස් නිලධාරිනියක වන ප්‍රීතිකා
යශිනි වැන්නන් පෙන්වා දිය හැකියි. මොවුන් එම රටවල උසස් රැකියාවලට උරුමකම් කියුවද
ලංකාව තුළ එම තත්ත්වය සම්පූර්ණයෙන්ම වෙනස්ය.
මානසිකව ඝාතනය කිරීම
වර්තමානයේ ඉතා ජනප්‍රියව පවතින “විනෝදාස්වාදය” පදනම් කරගත් ෆේස්බුක් පිටුවල
මූලිකත්වය ගෙන කටයුතු කරන්නේ එහි අර්ථයවත් නොදත් පුද්ගලයන් වීම ශෝකයට කරුණකි. “ආනන්දයෙන් ප්‍රඥාව කරා” යොමු කරවීම.
විනෝදාස්වාද සම්පාදනයේ මුඛ්‍ය අරමුණ බවට පත් වුවද වර්තමානයේ ෆේස් බුක් පිටුවල
දක්නට ලැබෙන්නේ පුද්ගලයන් මානසිකව ඝාතනයට ලක් කිරීම්ය. මෙම ෆේස්බුක් පිටුවල
නිරන්තරයෙන් අපහාසයට ලක්වන පිරිසක් ලෙස සංක්‍රාන්ති ලිංගික පුද්ගලයන් දැක්විය
හැකිය. “මුවා” “සමනලයා” වැනි විවිධ සතුන්ගේ නම්වලින් පවා තමන්වැනිම තවත් මනුෂ්‍යයෙකු හැඳින්වීම
කොතරම් දුරට සාධාරණදැයි අප අපගෙන්ම ඇසිය යුතුය. අප දන්සැලක් දුන් විට එය “මහා බත් දන්සැල” වන්නටත් ඔවුන් දන්සැලක්
දුන්විට “සමනල දන්සැල” වන්නටත්
හේතුව කුමක්ද? මේ සියල්ල අප අපගෙන්ම ප්‍රශ්න කළ යුතුය. මේ
ලෝකයට බිහිවන සියල්ලන් සියයට සියයක්ම සර්ව සම්පූර්ණව උපත ලබන්නේ නැත. අප සෑම
කෙනෙකු තුළම යම් යම් අඩුපාඩු තිබෙන්නට පුළුවන. උපතින්ම මානසික ශරීරයට හිමි කායික
ශරීරය නොලැබීම ඔවුන්ගේ වරදක් නොවන බව අප වටහා ගත යුතුය.
සමානාත්මතාවය, මානව හිතවාදී බව පිළිබඳ නිරන්තරයෙන්
කථා බහට ලක් වන මෙවන් සමාජයක අප වැනිම තවත් මනුෂ්‍යයන් පිරිසක් ෆේස්බුක් හි
විනෝදාස්වාද සම්පාදන යැයි දක්වා ඇති පිටුවල පළවන පෝස්ටර් හේතු කරගෙන මානසිකව
දිනෙන් දින ඝාතනයට ලක්වන බව කිවයුතුය. ප්‍රෞඪ ඉතිහාසයකට උරුමකම් කියන අප වැනි
ජාතියක සංස්කෘතිය විනාශ කිරීමට පැමිණි බලවේගයක් දෙස බලන කෝණයෙන් සංක්‍රාන්ති
ලිංගික පුද්ගලයන් දෙස බැලීමෙන් අප මිදිය යුතුය. අපේම සහෝදරියක්, සහෝදරයෙකු වුවද මෙවැනි තත්ත්වයකට පත් විය හැකි බවද මතක තබා ගත යුතුය.
තවදුරටත් මානසික ඝාතකයෙකුගේ භූමිකාවෙන් විනෝදාස්වාද සම්පාදනය උදෙසා
පවත්වාගෙන යන ෆේස්බුක් පිටු බැහැර විය යුතු අතර සංක්‍රාන්ති ලිංගික පුද්ගලයන්ද අප
වැනිම මනුෂ්‍යයෝය යන්න නිරන්තර සිත්හි තබාගෙන කටයුතු කිරීම වැදගත් වේ.
අකිලා නිර්මාණි ද සිල්වා
